Ədibin bütün şeirlərini və nəsrlə yazdığı “Qara sözlər” kitabını qazaxcadan dilimizə tanınmış Azərbaycan şairləri Elxan Zal Qaraxanlı və İbrahim İlyaslı çeviriblər. Abayın əsərlərinin Azərbaycan dilində nəşri barədə resenziya yazmış Abay adına Qazaxıstan Milli Pedaqoji Universitetinin Şərq filologiyası və tərcümə kafedrasının müdiri, filologiya elmləri doktoru, professor Knyaz Mirzəyev, bu tərcümənin böyük qazax mütəfəkkirinin şeirlərinin xarici dillərə ən yaxşı tərcümələrindən olduğunu bildirib. Pandemiya ilə əlaqədar kitabın geniş təbliği mümkün olmasa da, internet vasitəsilə görüşlər keçirilib, kitab Azərbaycan, Türkiyə və Qazaxıstan kitabxanalarına göndərilib.

 

 

Tanınmış ziyalılarımızdan olan Səlim Babullaoğlunun sözləri ilə desək, “ordu günündə doğulan şair” Elxan Zalın yubiley yaşına, onun 44 günlük Vətən müharibəsi dövründə yazdığı məqalələrdən və şeirlərdən ibarət “Ordu günü” adlı kitabı nəşr edilib. Bu kitab hələlik Qarabağ zəfərindən bəhs edən ilk bədii kitabdır. Şairin daha əvvəllər nəşr olunmuş məşhur “Türk əsrinin türküləri” və “ Yaquar yerişli zaman” adlı kitabları da təkrar nəşr olunacaq.

 

İcraçı direktor söhbətimiz əsasında bildirib ki, pandemiya ilə əlaqədar geniş fəaliyyət göstərmək çətinləşib. Lakin sentyabr ayına qədər Pakistan Respublikasının tarixi şəxsiyyətlərindən olan və bu dövlətin “mənəvi atası” sayılan böyük şair və filosof Məhəmməd İqbalın Azərbaycan dilində ilk kitabının nəşri də nəzərdə tutulub. Bundan əlavə Qazaxıstan səfirliyi ilə birgə “Müasir Qazaxıstan nəsr antologiyası” adlı kitab da dilimizə tərcümə olunaraq çap olunacaq.

 

Yekunda Əfqan Nəsirli onu da vurğulayıb ki, Elxan Zal Qaraxanlının 60 illik yubileyi qələbə günümüzdə, yəni 10 noyabrda geniş qeyd ediləcək. Yubiley tədbirlərinin həmçinin Qazaxıstan və Türkiyədə də keçirilməsi nəzərdə tutulub.